पोखरा। हेल्प नेपाल स्पोर्टस् र एभरेस्ट भलिबल क्लब आठौँ आरबीबी एनभिए भलिबल च्याम्पियनसिपको च्याम्पियन भएका छन् । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा शनिवार सम्पन्न च्याम्पियनसिपमा हेल्प नेपाल पुरुषमा र एभरेस्ट महिलामा च्याम्पियन भएका हुन् । च्याम्पियन टोली हेल्प नेपाल र एभरेस्ट भलिबल क्लबले समान पाँच लाख रुपैयाँसहित ट्रफी प्राप्त गरे । फाइनलमा हेल्प नेपालले त्रिभुवन आर्मी क्लबमाथि ३–२ को सङ्घर्षपूर्ण जित निकाल्दै उपाधि रक्षा गरेको हो । हेल्प नेपालले आर्मीलाई २०–२५, २७–२५, २३–२५, २९–२७ र २२–२० को रोमाञ्चक सेटमा हरायो । उपविजेता आर्मीले दुई लाख रुपैयाँसहित ट्रफी पायो ।
महिलातर्फ फाइनलमा भने एभरेस्टले नेपाल पुलिस क्लबलाई ३–१ ले हरायो । पहिलो सेट गुमाए पनि उत्कृष्ट पुनरागमन गर्दै एभरेस्ट पहिलोपटक च्याम्पियन बनेको हो । पुलिसले समूह चरणमा एभरेस्टमाथि ३–२ को जित निकालेको थियो । फाइनलमा भने एभरेस्टले बदला लिँदै पहिलो उचाल्यो । फाइनलमा भने एभरेस्टले पुलिसलाई १९–२५, २५–२२, २५–१८ र २५–१९ ले हरायो । उपविजेता पुलिसले दुई लाख रुपैयाँसहित ट्रफी पायो । महिलातर्फ नै शुक्रबार नै एपीएफ तेस्रो भएको थियो ।
प्रतिक्रिया लेख्नुहोस्:-