बिरुवा खबर, स्याङ्जा
स्याङ्जाको बिरुवा गाउँपालिका–३, राङखोला–बिरुवा सडकखण्ड ठाँटीमा स्कुटर दुर्घटना हुँदा एक महिलाको घटनास्थलमै मृत्यु भएको छ। दुर्घटनामा मृतककी १६ वर्षीया छोरी भने सकुशल रहेकी छन्।
कात्तिक ६ गते दिउँसो करिब २:३५ बजे बिरुवा गाउँपालिका–२ निवासी ३९ वर्षीया रेवती गुरुङले चलाएको ग २६ प १३५० नम्बरको स्कुटर दुर्घटनामा परेको हो।
प्रहरीका अनुसार स्कुटर चालकले नियन्त्रण गुमाउँदा स्कुटर सडकबाट करिब ५० मिटर तल खसेको थियो। दुर्घटनामा गम्भीर घाइते भएकी रेवतीको घटनास्थलमै मृत्यु भएको प्रहरीले जनाएको छ। स्कुटरको पछाडि सवार उनकी १६ वर्षीया छोरी गुञ्जन गुरुङ भने सकुशल रहेकी छन्।
घटनाको जानकारी प्राप्त भएपछि जिल्ला प्रहरी कार्यालय स्याङ्जाबाट प्रहरी तथा ट्राफिक प्रहरीसहितको टोली घटनास्थलमा पुगेको थियो।
दुर्घटनाग्रस्त स्कुटर घटनास्थलमै रहेको र सडकमा यातायात आवागमन अवरुद्ध नभएको प्रहरीले जनाएको छ। दुर्घटनाको कारणबारे प्रहरीले थप अनुसन्धान गरिरहेको छ।
यो संगै बिरुवा–राङ्खोला खण्डका विभिन्न ठाउँहरुमा जोखिम युक्त रहेको छ । यो समस्याको समाधान गर्नको लागी सम्बन्धित निकाय, स्थानिय सरकार बिरुवा गाउँपालिकालाई पनि ध्यानकर्ष गराउन चाहान्छौ । यो समस्याहरु समाधान नभए भोलिका दिनमा ठुलो समस्या नहोला भन्न सकिदैन ।
बिरुवा खबर
















प्रतिक्रिया लेख्नुहोस्:-