पोखरा, २७ वैशाख । नेपाल पत्रकार महासंघ कास्की को आयोजनामा पत्रकारितामा मल्टिमिडिया तथा एआई सम्बन्धी तालिम आइतबारदेखि पोखरामा सुरु भएको छ ।
वैशाख २९ गतेसम्म सञ्चालन हुने तालिमको उद्घाटन मुक्तिराम अर्याल ले गर्नुभएको हो । उद्घाटन कार्यक्रममा बोल्दै उहाँले पत्रकारितालाई समाज रूपान्तरणको मुख्य आधारका रूपमा चित्रण गर्नुभयो । पत्रकारिताले सरकार, समाज तथा विभिन्न संघसंस्थाका कमजोरी र सकारात्मक पक्षलाई उजागर गर्दै समाजलाई सही दिशामा डो¥याउने भूमिका निर्वाह गर्ने उहाँको भनाइ थियो ।
उहाँले कलमको शक्तिले समाजलाई परिवर्तन गर्न सक्ने उल्लेख गर्दै पत्रकारिताले सधैँ सरकारलाई झकझकाउने र समाजलाई व्यवस्थित बनाउने जिम्मेवारी बहन गर्ने बताउनुभयो । प्रविधिको तीव्र विकास तथा आर्टिफिसियल इन्टेलिजेन्स (एआई) को प्रयोग बढिरहेका बेला पत्रकारितालाई अझ सशक्त बनाउन नयाँ प्रविधिको प्रयोग आवश्यक रहेको उहाँले बताउनुभयो ।
तालिमले पत्रकारहरूलाई मल्टिमिडिया, एआई तथा बदलिँदो प्रविधिसँग अभ्यस्त गराउँदै ज्ञान, दृष्टिकोण र सीप विकासमा सहयोग पुग्ने उहाँको विश्वास थियो । साथै केही सञ्चारमाध्यमका कारण समग्र पत्रकारिता क्षेत्र नै बदनाम हुने अवस्था सिर्जना हुने भएकाले पत्रकारहरूले जिम्मेवार र व्यावसायिक बन्नुपर्नेमा उहाँले जोड दिनुभयो ।
कार्यक्रममा रमेश पौडेल ले पछिल्लो समय पत्रकारितामा प्रविधिको प्रभाव तीव्र रूपमा बढेको र मोबाइल जर्नालिज्मको महत्व विस्तार हुँदै गएको बताउनुभयो । प्रविधिको विकाससँगै पत्रकारिता थप सहज, छिटो र प्रभावकारी बन्दै गएको उहाँको भनाइ थियो । पत्रकारितालाई थप व्यवस्थित बनाउन महासंघले ‘समय आन्दोलन’ अभियान सञ्चालन गरिरहेको समेत उहाँले जानकारी दिनुभयो ।
माधव बराल ले तालिममा डिजिटल प्लेटफर्मको प्रभावकारी प्रयोग तथा एआई प्रविधिको प्रयोगसम्बन्धी विषयमा प्रशिक्षण दिइने जानकारी दिनुभयो ।
महासंघ कास्कीका सचिव भूपाल गुरुङ ले सञ्चालन गरेको उद्घाटन कार्यक्रममा उपाध्यक्ष माधव रेग्मी ले स्वागत मन्तव्य व्यक्त गर्नुभएको थियो ।
पोखरा महानगरपालिका को सहयोग तथा नेपाल खोजमूलक मल्टिमिडिया पत्रकारिता सञ्जाल (निमजिन) को प्राविधिक सहयोगमा सञ्चालन भएको तालिममा विभिन्न सञ्चारमाध्यममा कार्यरत २५ जना पत्रकार सहभागी रहेका छन् ।














प्रतिक्रिया लेख्नुहोस्:-