पोखरा, माघ १९
फागुन २१ गते हुने निर्वाचन नजिकिँदै गर्दा नेपाली कम्युनिस्ट पार्टी (नेकपा) कास्कीका उम्मेदवार तथा नेता–कार्यकर्ता मतदातासँग घरदैलो र ससाना भेटघाटमा व्यस्त भएका छन् । उनीहरू मतदाताका गुनासा, सुझाव र अपेक्षा सुन्दै पार्टीका एजेन्डा प्रस्तुत गरिरहेका छन् ।
नेकपा पुरानो र नयाँ शक्तिको संयोजन भएको उल्लेख गर्दै उम्मेदवारहरूले वर्तमान संकटको समाधानका लागि नेकपाको जित आवश्यक रहेको बताएका छन् ।
कास्की क्षेत्र नम्बर–१ का उम्मेदवार राजकाजी गुरुङ (करण) ले सोमबार रुपा गाउँपालिकाका विभिन्न क्षेत्रमा घरदैलो कार्यक्रममार्फत मतदातासँग भेटघाट गरे । रुपा–३ टाकेञ्जामा सहिदहरूको सालिकमा माल्यार्पण गरी कार्यक्रम सुरु गरेका उनले मतदाताबाट विगतका वाचा र पार्टीका एजेन्डा नबिर्सन सुझाव पाए ।
कास्की क्षेत्र नम्बर–२ का उम्मेदवार हेमबहादुर थापा (आमोद) ले गरिब, सुकुम्बासी, सीमान्तकृत समुदायदेखि राष्ट्रिय पुँजीपतिसम्म सबैको समतामूलक समाजको खाका नेकपासँग मात्र रहेको दाबी गरे । अखिल नेपाल सुकुम्बासी संघ जिल्ला समिति कास्कीले आयोजना गरेको परिचयात्मक कार्यक्रममा उनले भने, “गरिब, मध्यम वर्ग र श्रमजीवी जनताको अधिकार सुनिश्चित नगरी समृद्ध शहरको कल्पना गर्न सकिँदैन, र यसको नेतृत्व नेकपाबाहेक सम्भव छैन ।”
उनले संकटका बेला माथिल्लो वर्ग भाग्ने र त्यसको असर गरिब तथा मध्यम वर्गले भोग्नुपर्ने अवस्था रहेको उल्लेख गर्दै भने, “संकट पर्दा हेलिकोप्टर चढेर भाग्ने होइन, समाधान खोज्नुपर्छ ।”
कास्की क्षेत्र नम्बर–३ का उम्मेदवार गोपाल गिरी ले माछापुच्छ«े गाउँपालिका र पोखरा महानगरका विभिन्न क्षेत्रमा मतदातासँग भेटघाट गरिसकेका छन् । ‘जेन्जी’ युवाको भावना अनुसार काम गर्ने, जातीय विभेद अन्त्य गर्ने र भ्रष्टाचारमुक्त समाज निर्माणका लागि नेकपाको जित आवश्यक रहेको उनले बताए । आज अन्नपूर्ण गाउँपालिकामा चुनावी प्रचारप्रसार तथा जनतासँग भेटघाट गर्ने कार्यक्रम रहेको उनको सचिवालयले जनाएको छ ।














प्रतिक्रिया लेख्नुहोस्:-